أنا أعشق المأكولات البحرية (السي فود)..
وبمنتهى الصراحة، لو قفشوني أنا واللي زيي وحبسونا في مزرعة فراخ ده هيكون أكبر عقاب ليا، وأعتقد إن المحيطات العالمية هتقدر تتعافى أسرع كتير وقتها..
لما كنت باعيش طول الصيف في مرسى مطروح، كانت زيارة “المينا” وشراء السمك الطازج والجمبري والكابوريا من المراكب هواية يومية..
وتايلند جنة من جنات السي فود..
الأصناف كتير، ورخيصة نسبيًا، ومحلات السي فود منتشرة في كل مكان تقريبًا..
لذلك، كان من الطبيعي والمنطقي إن أول زيارة ليا في العاصمة بانكوك تكون لمطعم شهير للسي فود (قلت اسمه في الكتاب، بس مش هقوله تاني هنا، علشان لو مهتم كنت عرفت لوحدك 🙂 )
دخلت المطعم، وطلبت الطبق الرهيب ده ..
المكونات اللي قدرت أتعرف عليها:
- 2 حبة كابوريا
- 2 صدفة محار
- 3 شرائح سلمون
- 1 حبة سبيط (محشية باللحم الموجود في أذرع الكابوريا)
- 1 بيضة
- 1 استكاوزا
الشوربة كان طعمها رهيب، باختصار. وأجمل ما فيها كانت السبيطة المحشية بلحم الكابوريا.
الطبق كانت تكلفته حوالي 700 بات، وده كان يساوي 175 جنيه وقت زيارتي (دلوقتي حوالي 350).
ومن بعد الطبق ده أدمنت السي فود التايلندي وبقيت اتعشى منه كل ليلة 🙂