منذ شهر أو يزيد، اشتريت كمبيوتر جديداً. ودائماً عندما أذهب لشراء كمبيوتر جديد، فإنني لا أشتري أحدث مكونات متوفرة، وإنما أشتري ما قبل الأحدث مباشرة.
على سبيل المثال، عندما ذهبت لشراء الكمبيوتر، كان أحدث معالج متوفر هو core7، ولكنني لم أشتريه وإنما اشتريت core2 Extreme. وهذه نصيحة غالية أقدمها لكل من يتعامل مع التكنولوجيا. لا تشترِ الأحدث، وإنما ما قبل الأحدث مباشرة. والسبب؟ في الواقع هناك عدة أسباب: التوافق.. والخلو من الأخطاء.. ورخص الثمن..
وطبعاً كل كمبيوتر جديد يبهج قلبي وأنا أستمتع بسرعته وسعته الإضافية ونظافته.. تماماً مثلما يشعر الإنسان العادي عندما يشتري سيارة جديدة.. أو الإنسان الشجاع عندما يتزوج بامرأة جديدة.. 🙂
لكن هذا الكمبيوتر الأخير له وضع مختلف. صحيح هو سريع ونظيف وسعته هائلة.. ولكنه في الحقيقة بيستهبل 🙂
منذ فترة ليست ببعيدة، وأنا لا أطفئ الكمبيوتر تماماً.. يعني لا أستخدم أمر Shut Down إلا عندما أنوي الابتعاد عن الكمبيوتر لعدة أيام. أما في الأحوال العادية فأنا أضغط زر Sleep من لوحة المفاتيح. وعندما أضغط هذا المفتاح، يقوم ويندوز بإطفاء الشاشة، وإيقاف جميع الأنظمة الفرعية الداخلية في الكمبيوتر ما عدا الذاكرة.
وعندما أحتاج إلى استخدام الكمبيوتر مرة أخرى، فإن كل ما أفعله هو أن أضغط زر بدء التشغيل وعندها يهب ويندوز قافزاً أمامي في ثوانٍ معدودة.
يعني أستخدم الكمبيوتر زي ما أنا عايز، وأول ما أحب أمشي وأسيبه، أضغط على زر Sleep وأخلي الكمبيوتر ينام. وكانت كل الأجهزة السابقة تنام بدون مشاكل.. إلا الكمبيوتر الأخير ده..
هذا الكمبيوتر، مثل فاتن حمامة، “لا ينام” 🙂
واضح إنه واخد مسألة النوم دي بحساسية.. يعني.. يمكن حد في شركة إنتل فهمه إن النوم بالنسبة للأجهزة الجديدة عيب.. وإنه إذا كان ها ينام زيه زي الأجيال السابقة يبقى فايدته إيه؟ 🙂
وأنا شخصياً ليس لدي مانع من إنه يكون له شخصية مختلفة وإنه يحافظ على كرامته المهنية، ولكن لازم يكون صريح ومحترم.. يعني لو مش عايز ينام يقول أنا مش ها أنام.. لكن مش يستعبط ويعمل نفسه نام وهو في الحقيقة صاحي..
أول ما أضغط مفتاح Sleep البيه يتظاهر إنه فعلاً ها ينام.. ويغلق الشاشة ويعمل إنه دخل تحت اللحاف. وأول ما أدور وشي عنه ألاقيه رجع في كلامه وقام من السرير 🙂
وطبعاً لأني حسن النية.. فأنا “مش واخد خيانة”.. خلاص الكمبيوتر قال لي إنه ها ينام فأنا صدقته.. لكن المشكلة إني لما بروح المكتب وأفتح الكمبيوتر بتاعي ألاقي برنامج “ميسنجر” (اللي بيستهبل من كام يوم هو راخر) بيقول لي إني مسجل دخولي من مكانين.. مكانين إزاي؟
الأول شكيت إن حد من أولادي فتح الكمبيوتر بتاعي (محمد هو المشكوك في أمره الأول 🙂 ).. لكن بعد فترة تأكدت إن الكمبيوتر هو اللي بيستهبل ومش عايز ينام..
قعدت أفكر.. يا ترى إيه اللي مخليه مش عايز ينام؟ يعني مش معقولة بيشرب شاي وقهوة كتير.. ولا الكارثة ليكون “عامل دماغ” جامدة مش مخلياه ينام.
مش ها أطول عليكم.. لكن الموضوع أخد أبعاد تانية.. أصبحت المواجهة بيني وبين الكمبيوتر علنية.. الأول كان بتظاهر إنه بينام.. لكن دلوقتي لأ.. أقوله نام يرد عليا ويقولي لأ نام إنت.. 🙂
من كام يوم دخلنا أنا وهو في “دور عند” 🙂 أقوله نام يقولي لأ.. صممت إنه ينام.. وهو صمم إنه لأ.. عندها أمسكت بيدي بطرف سلك الفيشة وحلفت إنه لو ما نامش ها أشد سلك الفيشة.. طبعاً لأني راجل قديم في الكمبيوتر، أنا عارف شدة السلك دي جامدة عليه.. وها تخلي “دماغه تتهرش”.. ما أخبيش عليكم.. الكمبيوتر برضه مش غبي.. وحس بالشرار اللي بينط من عنيا وأنا باكلمه.. عندها “لم نفسه” وقام نايم.. بس انتقم من حتة تانية.. 🙂
قبل ما ينام لاحظت شاشة “جاري تثبيت التحديثات”.. مع إني مش طالب تحديثات من أي حتة.. ولما جيت أشغله مرة تانية، لقيته قاعد يثبت في التحديثات وبعدين يقوم طافي نفسه وعايد التشغيل.. عمل كده كتير؟ حوالي 30 مرة. طبعاً فهمت إن دي مش مسألة تحديثات.. دا الكمبيوتر مش عايز يعدي موضوع “سلك الفيشة” بالساهل..
لكن على مين؟ جبت الديسك الأصلي بتاع ويندوز وحطيته في السي دي روم وعملت “نقطة استعادة” ورجعت الكمبيوتر كام يوم ورا.. صحيح هو اشتغل.. بس فيه حاجة مش مضبوطة.. فيه سلك “ملمس” في دماغه..
قلت في نفسي طب وأنا ها أقعد “أهري وأنكت” في نفسي ليه.. أنا “أفرمته” وأشوف ها يعمل معايا إيه..
وقبل ما أفرمت افتكرت إني كنت عايز أجرب ويندوز 7 اللي حملته من موقع مايكروسوفت..
ها أحمله وأديكم خبر.. 🙂
ومن هنا لغاية التدوينة التالية، لو لقيتوني بادخل وأخرج على الميسنجر تبقوا عارفين إن مش أنا.. دا “المخفي” بيغني “سهران” زي عمنا عبد الوهاب.
كل سنة وانتم طيبين..
صباح الخير يا أستاذنا ..كالعادة.. مش ممكن الواحد يقرا أحد الموضوعات في المدونة من غير ما “يموت” على روحه من الضحك 🙂 .. أما بالنسبة للموضوع بقى.. فأنا لست خبيرة في هذا المجال علشان أعرف أقول رأي مفصّل عن حالة الأخ اللي بيستهبل ده 🙂 .. بس هو ممكن يكون صايم مثلاً ومش رايق في رمضان … لا لا .. حضرتك قلت انه بيعمل كده من فترة.. يعني قبل رمضان .. بس وجدتهاااا .. يبقى ممكن يكون عامل دماغ زي ما حضرتك قلت 🙂 أو “شارب سيجارة بني” على رأي الراجل ده اللي بيغني إللي ما حدش يعرف هو طالع منين 🙂 🙂
علياء..
آدي القراء ولا بلاش..
أول حاجة.. كتبتي التعليق بسرعة.. تاني حاجة.. التعليق نفسه دمه خفيف وفيه مدح في صاحب المدونة. يبقى الإنسان يعوز إيه أكتر من كده 🙂
ربنا يخليكي يا علياء.. وكل سنة وانتي طيبة..
السلام عليكم
🙂 الصراحة متت من الضحك بجد بجد اسلوب رائع بالكتابة وأنا أدمنت عليه و المشكلة انك بتتأخر علينا بالجرعات يا استاذ جمال 🙂
بالنسبة لحكاية عدم النوم أول مرة اسمع عن هذه المشكلة ,,, يعني الكمبيوتر عندي ما شاء الله بيسمع الكلام لأبعد الحدود و بالعكس انا مغلبه ومضايقه واحتمال يكون بدعي عليا 🙂
ياريت تجرب ويندوز 7 بسرعه استاذ جمال وتدينا رأيك فيه وانا حالياً بكلمك من الإصدار النهائي Release To Manufacture و شايفه مستقر لدرجه كبيرة باستثناء بعض مشاكل التوافق مع البرامج التي ستحل في الاصدارات الجديدة من هذه البرامج ,,,
في انتظار مقالتك القادمة استاذ جمال وأيضا في انتظار مقالتك عن بيل غيتس
لا تخاف ما نسيت 🙂
وبارك الله فيك وحفظك الله من كل سوء
ضياء..
وعليكم السلام ورحمة الله
أشكرك يا ولدي على رأيك في مقالتي.. وكل سنة وانت طيب.. 🙂
ربما تكون المشكلة لها علاقة بإن المعالج من نوع جديد Extreme وغير متوافق بشكل كامل مع ويندوز فيستا.. أو مع البوردة.. الله أعلم..
أما بالنسبة لويندوز 7، فأنا حملت نسخة RC من موقع مايكروسوفت ولكن وجدت بها الكثير من المشاكل لذلك مسحتها..
وقد سمعت من كام يوم إن فيه إصدار RTM من ويندوز 7 اتسرب من مايكروسوفت ووصل منتدياتنا (يا ترى مين سربه؟).. والظاهر إني ها أستخدمه مؤقتاً لحين وصول الإصدار النهائي إلى شواطئ المحروسة.. 🙂
بالمناسبة، ويندوز فيستا قعد بعد ظهوره شهور طويلة لا يُباع على أرفف المحلات في القاهرة..
أما بالنسبة لمقالات بيل جيتس.. فللأسف يا ضياء.. مفيش حد اتحايل عليا غيرك إنت وبنتي هبة.. وأنا محتاج على الأقل خمستاشر محايلة علشان أكتب فيها 🙂
بارك الله فيك يا ضياء.. وتطل دائماً منور المدونة.. 🙂
يا خبر ابيض
قصه تحفه 🙂
مفيش فايده 🙂
مفيش حاجه اقراها متخلينيش اهلك على روحى من الضحك 🙂
مع انى شوفت كل اللى حصل معاك على الواقع لكن متخيلتش ان ممكن تكتب عنه بالصورة الرائعه دى 🙂
جزاك الله كل خير
وربنا يخليك ليا 🙂
ربنا يخليكي يا ببس..
طبعاً من ساعة ما فتحتي المدونة.. وأنا باتحايل عليكي تقري مقالاتي مش زي الأول.. 🙂
أمال ها تعملي إيه لما تتجوزي وتروحي بيتك.. ما علينا 🙂
يا جماعة.. خليها تيجي مني أنا.. هبة بنتي فتحت مدونة جديدة.. انقروا على اسمها في أعلى التعليق ها ينقلكم ليها..
بس وحياة الشهر المفترج.. اللي يروح عند هبة ما ينساش يبقى يسأل عليا كل شوية.. 🙂
مبروك مدونة هبة يا أستاذ جمال 🙂 … وإن شاء الله ربنا يديك الصحة وطول العمر لما تشوف مدونات أولادها وأولاد أولادها قادر يا كريم 🙂 🙂 .. وأحب أطمن حضرتك إن المدونة دي بيتنا برضه وإللي مالوش خير في مدونة أستاذ جمال مش هيبقى له خير في مدونة هبة :)..
علياء..
ربنا يكرم أصلك يا بنتي.. ويوعدك بواحد ابن حلال يكون عنده مدونة تملا العين 🙂
ألا بالمناسبة.. صورتك فين؟ ولا موقع “جرافاتار” غدر عليكي؟ 🙂
إهئ إهئ 🙁 .. أمة لا إله إلا الله صورها ظاهرة إلا أنا .. “موقع جرافاتار بيستهبل يا فوزية”.. (بصراحة طنط فوزية مستحملة كتير ..كله عمال يشتكي لها 🙂 ) ..
أهلا أستاذ جمال
لأني واحد من اللي بيتخموا على طول في حكاية الماسنجر اللي على طول مسجل الدخول عند حضرتك, فأنا شايف إن حضرتك تشتري جهاز جديد وتعفي الأولاني من وجع القلب. بس لما تشتري جديد جرب تنومه عند اللي هاتشتريه منه الأول. 🙂
بالنسبة بقى لويندوز سفن فأنا حاليا باجربه. بس عايز أقول لحضرتك إني متغاظ منه. حاسس إنه مش أكتر من skin لويندوز فيستا اللي ما كانش ليه لازمة أساساً.
فعلا يا أستاذي عندك حق
مايكروسوفت بتستهبل قوي
أهلاً بأديبنا الكبير..
فكرة ممتازة.. قبل ما آخد الكمبيوتر البيت أقول للبياع ممكن أشوفه وهو نايم الأول 🙂
بالنسبة لويندوز 7 فأنا لسه ما شوهتش سمعته.. ولكني أميل إلى تصديق أنه “فيستا كما كان يجب أن يكون”..
بصراحة المشهور عن مايكروسوفت أنها بتتدارك أخطاءها وتقوم بتصحيحها.. وأعتقد أنهم في ويندوز 7 قد صححوا الخطأ المؤلم الذي وقعوا فيه في فيستا.. لذلك أتوقع له نجاحاً باهراً..
لاحظ كمان إن الناس زهقت من إكس بي ومستعدة تغير.. لكن ده موضوع يستحق مقالة منفصلة 🙂
نورت يا أديب..
الصراحة انا مستغرب من اختيارك لمعالج من نوع Extreme 🙂 لانه المعالج هذا موجه لفئه الـ Gamers على العموم مبروك عليك الجهاز نسيت ابارك الك سامحني استاذ جمال و ان شاء الله تنحل المشكلة بعد تثبيت ويندوز جديد .
“وقد سمعت من كام يوم إن فيه إصدار RTM من ويندوز 7 اتسرب من مايكروسوفت ووصل منتدياتنا (يا ترى مين سربه؟)”
هههه أنا حاسس انه أصابع الإتهام بتشير عليا ,,, لا مش لهدرجه هادي استاذ جمال اني اسرب اصدارات ويندوز انا هيك مستقبلي ممكن يضيع لو انتشر الكلام هذا خصوصاً انه اسمي الحقيقي معروف للجميع 🙂
“والظاهر إني ها أستخدمه مؤقتاً لحين وصول الإصدار النهائي إلى شواطئ المحروسة..”
بالنسبه لإصدار RTM هو الإصدار النهائي لانه كما تعلم الإصدار التي ستخدمه شركات تصنيع الحاسب HP و DELL …الخ وبالتأكيد هذه الشركات لن تضع على حواسيبها الا الاصدار النهائي فلا يوجد داعي للإنتظار ولا اعتقد انه فيه اصدارات رح تطرحها مايكروسوفت بعد هذا الإصدار ,,,
“أما بالنسبة لمقالات بيل جيتس.. فللأسف يا ضياء.. مفيش حد اتحايل عليا غيرك إنت وبنتي هبة.. وأنا محتاج على الأقل خمستاشر محايلة علشان أكتب فيها”
طيب انا مش مهم بس غلاوة بنتك هبه عندك اكثر من كل الناس يعني ما اعتقد رح ترفض الها طلب 🙂 ( وضعتك في موقف محرج استاذ جمال 🙂 )
ضياء..
بالنسبة للمعالج، كلامك صحيح إن الألعاب ها تستفيد منه كتير، ولكن كمان بقية البرامج -خصوصاً برامج الجرافيكس التي نستخدمها كثيراً- يتحسن أداءها بشكل ملحوظ معه، أو على الأقل هذا ما قرأته. وأنا قارنته بجهاز المكتب Core2 Quad 6700 وكانت النتيجة لصالح الإكستريم بمسافة واضحة. وحسب ما قرأت، فإن نظام الذاكرة والكاش وإدارة الطاقة فيه أفضل كثيراً..
بالنسبة لحكاية تسريب البرامج، فإن مايكروسوفت لا تضيع مستقبل أحداً وإنما إذا وجدت شخصاً مميزاً في كسر حماية برامجها فإنها تقوم بتعيينه في الشركة. يعني حاول تكسر حماية برامجهم بأكبر قدر ممكن لغاية ما يلاحظوا وعندها سيقدمون لك عرض توظيف 🙂 ثم أنا ما قلتش مين اللي سرب النسخة.. ولا على رأي المثل.. كاد المريب أن يقول خذوني 🙂
كلامك صحيح عن حكاية RTM، ولكن أنا من أنصار نظرية المؤامرة، ولا أستبعد أن تكون مايكروسوفت قد قامت بتعديل نسخة الـ RTM قبل تسريبها عن عمد ووضعت فيها مكونات لجمع المعلومات. خليك منطقي.. مين ها يقدر يشتكي إن مايكروسوفت بتتجسس عليه وهو سارق النسخة أصلاً.. أنا ليس لدي دليل على هذا، ولكن هذا مجرد حدس.. مايكروسوفت لن تستطيع قانوناً أن تضع أي برامج تجسس في نسختها الأصلية، ولكنها تستطيع أن تفعل هذا بمنتهى السهولة في النسخة التي تقوم بتسريبها عمداً..
طبعاً حد يقولي لي معقول مايكروسوفت تقوم بتسريب برامجها بنفسها.. أرد عليك رداً بسيطاً.. مفيش حد بيدور على البرامج المنسوخة دي سوى “الشعوب الميئوس منها شرائياً”.. ومنها وعلى رأسها طبعاً الشعوب العربية والإسلامية.. 🙂
بس ده موضوع تاني.. نبقى نتكلم فيه على راحتنا لما نتقابل.. 🙂
ثم إنت ليه يابني تحرجني مع بنتي.. لا حول ولا قوة إلا بالله.. يعني أنا بحبك وانت تديني “بمبة”.. 🙂
طبعا التدوينة بعد التعليقات وصلت لمناطق غويطة! زي حكاية التجسس دي!
عموما… مسألة النوم دي ربما يكون لها علاقة بالمعالج فعلا.
ويندوز 7 متغاظ منه جدا… فيه حاجات كتير أقل كفاءة من مثيلتها في ويندوز فيستا، عدلوا حاجات وبوظوا حاجات تاني. نسخ 7 التجريبية كان فيها ملحوظة غريبة جدا… لو عملت Hibernate هتلاقي الجهاز اتخمد ورجع اشتغل تاني بعد وقت معين!
أهلاً بالدكتور الأديب الرسمي المعتمد.. 🙂
الله.. طب ما موضوع النوم بيحصل معاك انت كمان أهه.. بس المرة أصعب.. 🙂
بالنسبة لقراء المدونة الذين لا يعرفون دكتور أحمد الشمسي، فهو طبيب وأديب وعبقري كمبيوتر . أحمد كان بيقرا عن برمجة ويندوز وهو في الإعدادية (فيه ناس بتقول إنه عبقري علشان تتلمذ على يد أستاذ عبقري 🙂 ).
بالنسبة لزوار المدونة المترجمين (يعني اللي -بكل أدب- مالهمش في الكمبيوتر جامد)، فإن وضع Sleep (النوم) معناه (ريّح شوية وها أصحيك بعد ساعة أو اتين) وفيه بيطفي ويندوز الأجهزة الفرعية وبيخللي الذاكرة شغالة، لكن وضع Hibernate (السبات) معناه “كل أكلة حلوة وخد لك تعسيلة طويلة..” 🙂 يعني ويندوز بيحفظ محتويات الذاكرة على القرص وبيقفل الكمبيوتر فعلاً.. ولما يقوم بيعيد قراءة محتويات الذاكرة من القرص وبكده يبدأ أسرع ويحتفظ بنفس البرامج والملفات مفتوحة..
على فكرة، أنا لاحظت حاجة مهمة.. إذا انقطعت الكهرباء ورجعت تاني، فإن كل الأجهزة النايمة بتصحى.. 🙂 بجد.. كأننا ضغطنا مفتاح التشغيل.. جربوها.. اقطع الكهرباء بالقصد عن الكمبيوتر وأعد توصيلها وشوف..
شكراً يا د. أحمد على رأيك في ويندوز 7، وعلى فكرة هو ده نفس رأي صاحبك برضه 🙂
أنا ها أثبت إصدار تجريبي منه النهاردة.. وربنا يسهل وتكون أعصاب الكمبيوتر بتاعي ارتاحت شوية ويقدر ينام 🙂
مش قادرة أقول لحضرتك أنا وقعت في الأرض من كتر الضحك
أنا تخيلت حضرتك وانت بتحكي فيس تو فيس كده وتخيلت ردود أفعالك
خفة دم حضرتك ماوصفتش، وهي طريقة تخش القلب والعقل في وقت واحد دون تردد
اما بالنسبة للكمبيوتر اللي بيستهبل ده
فحله انك ترجعه للشركة اللي معرفتش تربيه كويس وتقوله الزبون دايما على حق
اعتبرني من مؤيدي رجوع حضرتك للكتابة عن بيل جيتس من جديد
ألف مبروك على مدونة هبهوبة
ومما لا شك فيه أن هذا الشبل من ذاك الأسد
هبة.. مرحب بيكي في المدونة.. وأشكرك بشدة على رأيك الجميل في أسلوب العبد لله..
أما بالنسبة لحكاية ترجيع الكمبيوتر إلى الشركة، فإحنا ما نقدرش نعمل كده حتى في نفس اليوم اللي نشتري فيه الكمبيوتر.. ما بالك بعد عدة أيام من استخدامه.. ثم بالله عليكي.. ها أرجعه أقول لهم إيه.. الكمبيوتر شغال كويس بس ما بينامش 🙂 دا حتى الراجل ها يفتكرني مجنون.. 🙂
اشكرك علشان اتحايلتي عليا في موضوع بيل جيتس.. كده يبقى المتحايلون 3 وأنا حالف ما أكتبش إلا لما يوصلوا خمستاشر 🙂
عقبال مدونة مازن إن شاء الله..
طيب لو اتحايلت عليك كل يوم 3 مرات
على مدى 5 أيام
مش كده هبقى انا لوحدى 15
طب ما الأحسن والأسرع تتحايلي عليا الخمستاشر مرة في يوم واحد وتخلصي 🙂
طبعاً لأ ما ينفعش.. لازم المحايلات تبقى unique، يعني one mohaila per person
أشكرك على شعورك الطيب.. 🙂
استاذ جمال النسخه ليست مسربه بل نسخه شرعيه ,,, اللي حصل انه مايكروسوفت وضعت النسخه على شبكة مطورين مايكروسوفت Msdn و شبكة Technet
واحد من مشتركين هذه الشبكات قام بتحميل النسخه منها و رفعها على الانترنت ,,,
والنسخه اللي عندي أصليه ميه في المية لاني قارنت أرقام الـ Hash لملف الـ ISO الخاص بويندوز 7 مع أرقام الـ Hash الموجوده على موقع شبكة مطورين مايكروسوفت Msdn و طلعت نفس الأرقام بالضبط و بهيك كنت متأكد بدرجة 100 % انه نسختي أصليه نفس النسخه التي أرسلت لشركات تصنيع الحواسيب HP و DELL ,,,
فصعب جدا استاذ جمال انه يكون فيه برامج تجسس في النسخه الأصليه الخاصه بشركات التصنيع لأنهم لو عرفوا حتكون مصيبه كبرى وفضيحه ما بعدها فضيحه و مايكروسوفت بغنى عنها ,,,
“على فكرة، أنا لاحظت حاجة مهمة.. إذا انقطعت الكهرباء ورجعت تاني، فإن كل الأجهزة النايمة بتصحى.. بجد.. كأننا ضغطنا مفتاح التشغيل.. جربوها.. اقطع الكهرباء بالقصد عن الكمبيوتر وأعد توصيلها وشوف.. ”
صحيح أستاذ جمال انا لاحظت هذا الشيء في جهازي وبما انه الكهرباء عندنا بتقطع ساعات طويله كل يوم اكثر من 8 ساعات و احيانا فوق الـ 10 مرات بتقطع بنفس اليوم فأنا مش محتاج أجرب لانه كل المشاكل اللي بتخدث من انقطاع الكهرباء واجهتها ههه 🙂
“ثم إنت ليه يابني تحرجني مع بنتي.. لا حول ولا قوة إلا بالله.. يعني أنا بحبك وانت تديني “بمبة”..”
🙂 حقك عليا والله يخليك النا استاذ جمال
أول شيء لازم تعرفه على النت -وخدها مني نصيحة قبل ما تتعلمها بالطريقة الصعبة- إنك لا يجب أن تثق بأي حد أو أي شيء.. 🙂
يعني حتى لو مايكروسوفت ما حطتش حاجة صفرا في النسخة، إيه اللي ها يضمن لك إن المستخدم (المحترم) اللي سرب النسخة ما حطش فيها “بعبع”.. 🙂
ثم أنا قلت إن معنديش دليل على ما قلته.. وإن ده مجرد عدس (قصدي حدس)..
طبعاً مايكروسوفت ما تقدرش تحط أكواد تجسس في نظام التشغيل لأن المحاكم هناك ممكن “تنتف” ريش بيل جيتس.. لذلك هو على استعداد أن يدفع أي مبلغ مقابل أن يقوم شخص آخر بهذه المهمة 🙂
أما بالنسبة للبمبة فأنا طبعاً مسامحك.. 🙂
استاذ جمال اللي سرب النسخه لو عدل فيها أي تعديل بسيط لو حتى اضاف ملف حجمه 1 KB رح تتغير أرقام الـ Hash الخاصه بملف الـ ISO وانا حكيت الك اني قارنت أرقام الـ Hash مع الأرقام الموجودة على مواقع مايكروسوفت وطلعت نفسها يعني ما تقلق النسخه تمام وأصليه وما فيها أي ملف تجسس ان شاء الله بس انتا توكل على الله و جربها وان شاء الله رح تعجبك 🙂
أشكرك على اهتمامك يا ضياء..
الظاهر إنك بتتكلم عن نسخة برامج نت. هناك مستخدم كريم له خبرة طويلة بالنسخ الأصلية اسمه PrinceK77 شرح موضوع الهاش ده بالتفصيل في منتدى برامج نت 🙂
أنا طبعاً ما عنديش صبر لدرجة إني أحمل 19 ملف ويقعد الرابدشير يتأمر عليا ويقولي حملت وما حملتش.. أنا أفضل التورنت..
دخلت أحد مواقع التورنت لقيت ربع سكان الكرة الأرضية بيحملوا نسخة معينة.. قلت أكيد ها تبقى نسخة كويسة.. ولما قارنت هاشتها مع مايكروسوفت لقيتها مش متوافقة مع أي نسخة
2F509C2198547110A530AD8905706058B8D87C84
بس أنا برضه غامرت وثبتها على لابتوب محمد ابني.. والغريب إنها اتكركت وشغالة فلة 🙂
وبعدين إحنا عندنا مثل مصري بيقول “إيش ياخد الريح من البلاط”.. يا عم خللي مايكروسوفت أو أي بني آدم تاني يتجسس وياخد كل المعلومات اللي هوه عاوزها..
أصلاً لو أي إنسان من أوروبا والدول المتقدمة شاف الكمبيوتر بتاع أي واحد من العالم التالت من جوه ها يغمى عليه من القرف 🙂 🙂
بس خدوا بالكم جميعاً .. أنا سأشتري نسخاً أصلية من ويندوز 7 فور صدورها.. وسوف أعرض لكم صورها وصور الفاتورة فور شرائها على هذه المدونة..
أنا باتكلم جد والله.. أنا لا أحب ولا أستخدم سوى البرامج الأصلية.. 🙂
أشكرك على اهتمامك يا ولدي..
🙂 استاذ جمال انا عضو قديم ببرامج نت قبل العضو PrinceK77 و مشارك من بدايات المنتدى و لى عضوية قديمه سابقة و من زمان عرفت بمسألة التحقق من النسخة الأصلية عن طرق الـ Hash من أيام صدور Windows Vista ,,, عموماً نسخه العضو PrinceK77 أصليه و أعتقد انه موفر رابط تورنت بموضوعه و فيه أعضاء اخرين غيره موفرين روابط تورنت للنسخه 🙂 ,,,
بالنسبة للبرامج الأصليه أنا أعلم انك تحب استخدام الأصلي حتى أنك ضد القرصنه بشكل عام و قرأت لقائك الرائع مع الأستاذ تركي العسري واعلم رأيك جيداً ,,,
ولكن استاذ جمال هناك من فتوى بجواز استخدام البرامج المقرصنه الصادرة من شركات أو دول تعلن الحرب على المسلمين
رابط المقال:
http://arabic-tech.com/index.php/articles/view/31
احنا في غزة ليس لدنيا ولا بائع واحد يوجد لديه أو يبيع نسخ أصليه من البرامج أو الأفلام ,,, الأصلي هادا ما بتعرفه محلات غزة مستحيل تجده عندنا ,,, وانتا عارف ظروف غزة والحصار أيضاً و حتى لو كان هناك برامج أصليه ما رح أقدر اشتريها لاني طالب بالجامعة و ظروف الحياة عندنا صعبه و أقولها لك وبكل صدق رح تكون تكلفه عالية عليا لا أستطيع تحملها ,,,
مع العلم انه انا شخصياً لو وجدت برنامج عربي مقرصن ما بستخدمه فقط البرامج الأجنبية و بالطبع أنا ضد قرصنه البرامج العربيه وأعلم آثارها المدمره على المبرمجين العرب وبما اني بيوم قد أكون مبرمج فأنا لن أفعل مع اخواني المسلمين شيء أكره ان يفعله أحد معي ,,,
أتمنى أن تعطيني رأيك استاذ جمال بالموضوع لاني من زمان حابب أكلمك فيه هذا الموضوع واعذرني على كثرة ردودي وحرف التدوينه عن مسارها
وبارك الله فيك استاذي
ضياء..
أنا طبعاً أمزح معك بهذه التلميحات.. 🙂
بالنسبة لموضوع القرصنة ونسخ البرامج، أعدك بأن أتحدث في هذا الموضوع بالتفصيل الوافي في مقالة قادمة في المدونة..
أنا لا أريد أن أتحدث عن هذا الموضوع فقط، وإنما عن موضوع “المصادر المفتوحة” أيضاً..
أشكرك على رابط المقال الذي يحتوي على الفتوى، وقد قرأته ولي عليه تحفظات.. سأوردها في مقالتي القادمة..
بل أنا أشكرك على كثرة ردودك لأنها “عاملة حس” للمدونة.. 🙂
وأرجو أن تستمر على هذا النحو.. (على الأقل لغاية المدونة ما تتشهر 🙂 )..
كده برضه يا بابى 🙂 انا مقدرش انسى مدونتك خالص دى هى اللى حببتنى فى المدونات 🙂
على العموم ربنا يسامحك
بس انا عايزة اقول للاستاذ ضياء :ان حضرتك وضعت بابا فى موقف محرج منذ نا قرات انا هذا المقال
🙂 🙂
أسلوب فكاهي جميل حقاً يا أستاذ جمال. لقد ضحكت من قلبي أثناء قراءة المقال واستمتعت بالأسلوب الجميل. أرجو أن يحل ويندوز الجديد المشكلة.
أمتعنا الله دائماً بخفة ظلك وروحك المرحة.
محمد..
أشكرك على رأيك في أسلوب المقالة وعلى ذوقك..
أتمنى لك ولكل أسرتك رمضان سعيداً.. 🙂
قرأت المقال الذي تشير إليه وصلة السيد ضياء، وبصراحة أنا غير موافق نهائياً على ما ورد فيه. فأنا لا أرى أن نستحل حقوق الآخرين تحت أي دعوى.
السلام عليكم أستاذ جمال كل عام وأنت بخير، قرأت المقال وكالعادةأستمتعت بهذا المزيج الرائع الذي يميز كتاباتك من خفة الظل والذكاء والقدرة علي جذب القاريء حتي الحرف الأخير. أما بخصوص الكمبيوتر اللي بيستهبل فلا أستطيع أن أفيدك كثيرا برأيي لأنني شخصيا قد عانيت ولا زلت من إستهباله إلا أن لدي إقتراح لم لا تجرب توزيعة أوبونتو لينوكس فأنا شخصيا أقوم بتجربتها حاليا بجوار الويندوز وهي رائعة بكل المقاييس ولها أدبيات وبرامج ومنتديات دعم كثيرة ومتوافره علي الشبكة. جرب وأخبرني برأيك.
تامر..
أهلاً بيك في مدونتي.. 🙂
أشكرك على رأيك، وأحييك أيضاً على أسلوبك الراقي في الكتابة.
بالنسبة لنظام أوبنتو، فأنا بالفعل جربته منذ أن قرأت مقال “سي ديفوراك” في “بي سي ماجازين” عنه. وبالفعل هو نظام جيد، ولكنني للأسف “محبوس” مع الويندوز بسبب البرامج العديدة التي لا أستطيع الاستغناء عنها. ربما بعد انتقال العديد من المستخدمين لنظام أوبنتو تقوم الشركات الكبرى (مثل أدوبي) بنقل برامجها إليه.
مرة أخرى مرحباً بك في المدونة .. 🙂
صباح الخير
واضح طبعا ان الكمبيوتر مش أهلاوي …اتأكد من هوية صاحب المحل
وممكن برضه تغني له أغنية من أغاني الغزل الكمبيوتري المنتشرة في سوق اليومين دول وأشهرها:
يا مسطب حبك في قلبي ومكنسل منه الاهات
بعدك خلاني اهنج واحرق كل الرامات
كارت عيني ولع وكمان الساوندات
من كتر ما اتحركت انصبت بالبادات
فضلت ادور عليك نصحوني بالشات
اتخيلت بيك ياخسارة طلعت فيروسات
من بعدك عقلي خلاص اتعمله فورمات
وعلشان اشوفك تاني لازم ابقي فات
لا نافع في ويندوز ولا حتي ريد هات
من كتر الم فراقك باسقط ملفات
عملت سكان لقلبي مالاقيتش بارتيشنات
حتي التقسيمة ضاعت ياخسارة اللي فات
حياتي دخلها فيروس ارجوك ارحم الاهات
محمد عثمان..
آسف على التأخر في الرد.. اقرأ آخر تدوينة وانت تعرف السبب 🙂
تعرف.. الإنترنت اللي قطعت عندي دي رحمتك مني..
تعرف لو كنت كتبت قصيدة شعرية زي دي وأنا مزاجي رايق كنت عملت فيك إيه 🙂
بجد قصيدة تحفة.. 🙂
أستاذ جمال
وحشتنا مقالاتك
فينك
نحن على أحر من الجمر في انتظار المقال الجديد
لا تحرمنا طويلا من الاستمتاع به
ولا هبة لخمتك شوية في المدونة بتاعتها??
هبة..
اعذريني على التأخر في الرد.. بس آخر تدوينة فيها السبب 🙂
والله يا هبة المقالات موجودة كلها في الفرن.. بس المشكلة إن الأنبوبة خلصت.. وأول ما أغيرها ها تطلع كلها مرة واحدة.. 🙂
هبة غلبانة ومحرومة من المدونة بتاعتها.. وأنا وهي عمالين طول اليوم نكنس رمل وتراب من كل مكان حوالينا.. 🙂
كل سنة وانتي طيبة..
إقتباس :
/*
منذ شهر أو يزيد، اشتريت كمبيوتر جديداً. ودائماً عندما أذهب لشراء كمبيوتر جديد، فإنني لا أشتري أحدث مكونات متوفرة، وإنما أشتري ما قبل الأحدث مباشرة.
*/
أفضل ما قيل فى عالم مكونات الكومبيوتر I couldn’t agree more
عجبنى العنوان جدا + طريقة حضرتك الرائعة لطرح الموضوع
بس انا ليا تعليق صغير و عارف ان الناس كلها هتضربنى
ويندوز 7 و ويندوز فيستا نظامين أفشل من نظام ويندوز 97 لو حد يفتكره
كل إهتمامهم حاليا بال GUI و إبقى قابلنى
حاليا أعمل على Windows XP فى المنزل ، و Windows Server 2003 فى العمل
و Windows Server 2008 عند العمل على سيرفر الشركة ..
بالمناسبة الأخير خلب لبى و أنسانى مشاكل الفيستا و رجع لى الثقة فى ميكروسوفت مرة أخرى
موضوع رائع استاذنا جمال عمارة و إن شاء الله الكومبيوتر هيبطل يستهبل :d
بسادة..
اعذرني في التأخر في الرد عليك.. ولكن آخر تدوينة فيها السبب 🙂
أنا أوافقك على رأيك في ويندوز 98؟؟؟ وأعتقد إن ويندوز 7 ليس نظام تشغيل جديداً وإنما تحسيناً لفيستا.. ولكن لا أستطيع أن أجزم بذلك قبل قراءة المزيد عنه..
بالنسبة لأنظمة التشغيل التي تذكرها، فهي الأقل تسبباً في المشاكل ولذلك يحبها الناس..
لكن إنت لم تقل لي أين تعمل؟
انا والله من حسن حظي اني اقرأ مدونات حضرتك بس انا وصلت اهنا بطريقه غريبه بس الحمد لله وصلت وكفايه أوي اني اقرا كلام كتبه المهندس جمال عماره
اقول لحضرتك وصلت ازاي
انا كنت عايز افهم حاجه في الinheritance قلت اكتب في جوجل المهم كتبت راح جايب ليا منتدي vb4arab دخلت لقيت كتاب لواحد اسمه أحمد جمال لسه بارقرا فيه لقيت مقدمه لواحد اسمه تركي العسيري قمت بحثت عن تركي العسيري بحثت لقيت موقع قمت دخلته فلقيت تركي العسيري بيقول انا بادئ دراسه برمجه من بدايه التسعينيات قلت ده بقي الراس الكبيره قالي اللي علمني هو جال عماره قلت يااااااااااه في أكبر من كده قمت باحث عن عن حضرتك لقيت ليك مؤلفات قلت ياه فيه ناس جامدين كده وعرب وانت حضرتك طلعت مترجم ومبرمج فياريت تفيدنا بعلمك الواسع ويكون ليك جزيل الشكر كتب حضرتك نجيبها منين من مصر وربنا يعينك في حمل امانه البرمجه والترجمه في الامه الاسلاميه
عبد الله..
حمداً لله على سلامتك.. ونشكر الله أن أعثرك على مدونتنا المتواضعة التي لا تزال لم تُفتتح رسمياً بعد..
أشكرك على رأيك في شخصي المتواضع.. وأدعو الله أن أكون عند حسن الظن..
إن شاء الله يفتح الله علي وأكتب العديد من المقالات التقنية عن الدوت نت، والترجمة.. فور افتتاح المدونة رسمياً..
أرجو أن تستمر في زيارتنا.. وأنا تحت أمرك في أي سؤال.. 🙂
هيييييييييييييييييييه
اسمى اتكتب
هييييييييييييييييييه
اه والله فعلا يا مدام هبه احنا غرقانين
ربنا ما يوريكى